യാത്രകൾ ഇനി വെറുമൊരു വിനോദമല്ല; യുവത്വം നിലനിർത്താനുള്ള എളുപ്പ വഴി; പുതിയ പഠനവുമായി ഗവേഷണ സംഘം

യാത്രകൾ ഇഷ്ടപ്പെടാത്തവരായി ആരുമുണ്ടാകില്ല. എന്നാൽ വെറുമൊരു വിനോദത്തിനപ്പുറം, വാർദ്ധക്യത്തെ ചെറുക്കാനുള്ള ഏറ്റവും മികച്ച വഴികളിലൊന്നാണ് യാത്ര എന്ന് പറഞ്ഞാൽ വിശ്വസിക്കുമോ? പ്രായമാകുന്നത് തടയാൻ ആന്റി-ഏജിംഗ് ക്രീമുകളെയും ബ്യൂട്ടി ട്രീറ്റ്‌മെന്റുകളെയും ആശ്രയിക്കുന്നവർ ഇനി ഒന്ന് മാറി ചിന്തിക്കുന്നത് നന്നായിരിക്കും. യൗവനം നിലനിർത്താൻ പാസ്‌പോർട്ടും ബാഗും എടുത്ത് ഒരു യാത്ര പോകുക. ഇങ്ങനെ യാത്ര ചെയ്യുന്നത് ചർമ്മത്തെയും ശരീരത്തെയും യുവത്വത്തോടെ നിലനിർത്താൻ സഹായിക്കുമെന്നാണ് പുതിയ പഠനങ്ങൾ പറയുന്നത്.

ഓസ്‌ട്രേലിയയിലെ എഡിത്ത് കോവൻ സർവകലാശാലയിലെ ഗവേഷകരാണ് ഈ പുതിയ പഠനവുമായി രംഗത്ത് വന്നിരിക്കുന്നത്. ടൂറിസം ആരോഗ്യത്തെയും പ്രായത്തെയും എങ്ങനെ സ്വാധീനിക്കുന്നു എന്നതിനെക്കുറിച്ച് നടത്തിയ പഠനമാണ് പുതിയ ഉൾക്കാഴ്ചകൾ നൽകുന്നത്.

എഡിത്ത് കോവൻ സർവകലാശാലയിലെ ഗവേഷകർ 'എൻട്രോപ്പി' (Entropy) എന്ന ശാസ്ത്രീയ തത്വത്തെ അടിസ്ഥാനമാക്കിയാണ് ഈ പഠനം നടത്തിയത്. പ്രപഞ്ചത്തിലെ എല്ലാ വസ്തുക്കളും സാവധാനം ഊർജ്ജം നഷ്ടപ്പെട്ട് നാശത്തിലേക്ക് നീങ്ങുന്ന പ്രക്രിയയാണ് എൻട്രോപ്പി. മനുഷ്യശരീരത്തിലും ഇതേ തത്വം ബാധകമാണ്. എന്നാൽ പോസിറ്റീവായ യാത്രാനുഭവങ്ങൾ വാർദ്ധക്യം മന്ദഗതിയിലാക്കുമെന്നും ചെറുപ്പം നിലനിർത്താൻ സഹായിക്കുമെന്നും പഠനത്തിൽ തെളിഞ്ഞിരിക്കുകയാണ്.

വാർദ്ധക്യത്തെ ചെറുക്കാൻ യാത്രകൾ എങ്ങനെ സഹായിക്കും?ഏതൊരു ജീവജാലവും കാലക്രമേണ വർദ്ധക്യത്തിലെത്തും. അത് മാറ്റമില്ലാത്ത ഒരു പ്രകൃതി നിയമമാണ്. എന്നാൽ മാനസികവും ശാരീരികവുമായ പരിരക്ഷ നല്കുന്നത് വഴി ചെറുപ്പം നിലനിർത്താനും വാർദ്ധക്യം മന്ദഗതിയിലാക്കാനും സാധിക്കും എന്നാണ് പഠനങ്ങൾ പറയുന്നത്. അതിനുള്ള ഒരു വഴി യാത്രയാണ് എന്നാണ് എഡിത്ത് കോവൻ സർവകലാശാലയിലെ ഗവേഷകർ പറയുന്നത്. അങ്ങനെ വരുമ്പോൾ ടൂറിസം വെറുമൊരു വിനോദമല്ല, മറിച്ച് ഒരു 'തെറാപ്പി' ആയി മാറുന്നു. യാത്ര എങ്ങനെ വാർദ്ധക്യത്തെ ചെറുക്കൻ സഹായിക്കുന്നു എന്ന് പരിശോധിച്ചാലോ?

മാനസിക സമ്മർദ്ദം കുറയ്ക്കുന്നുജോലിയിൽ നിന്നെല്ലാം ഒരു ചെറിയ ബ്രേക്ക് എടുത്ത് ഒരു യാത്ര പോയാലോ എന്ന് ചിന്തിക്കുന്നവർ നിരവധിയാണ്. പ്രത്യേകിച്ച് പുതിയ തലമുറ യാത്രകൾ ഒരുപാട് ഇഷ്ടപ്പെടുന്ന ഒരു സമൂഹമാണ്. ദൈനംദിന ജീവിതത്തിലെ തിരക്കുകളിൽ നിന്നും ജോലിയിലെ സമ്മർദ്ദങ്ങളിൽ നിന്നും യാത്രകൾ മോചനം നൽകുന്നു. പുതിയ ചുറ്റുപാടുകൾ കാണുന്നതും ആസ്വദിക്കുന്നതും വഴി ശരീരത്തിലെ 'സ്ട്രെസ് ഹോർമോണുകൾ' കുറയാനും പോസിറ്റീവ് ഊർജ്ജം ലഭ്യമാകുകയും ചെയ്യുന്നു. ഇത് കോശങ്ങളുടെ തേയ്മാനം കുറയ്ക്കാനും സഹായിക്കുന്നു.

രോഗപ്രതിരോധ ശേഷി വർദ്ധിപ്പിക്കുന്നുപുതിയ സ്ഥലങ്ങളിലെ കാലാവസ്ഥ, ആഹാരം, പരിസ്ഥിതി എന്നിവയുമായുള്ള സമ്പർക്കം നമ്മുടെ പ്രതിരോധ സംവിധാനത്തെ ഉത്തേജിപ്പിക്കും. ഇത് ശരീരത്തിന്റെ സ്വയം പ്രതിരോധ ശേഷി (Self-defense system) കൂടുതൽ ശക്തമാക്കുകയും ചെയ്യും. കോശങ്ങളുടെ പുനരുജ്ജീവനത്തിന് സഹായിക്കുന്ന ഹോർമോണുകൾ യാത്രയ്ക്കിടയിൽ ശരീരത്തിൽ ഉത്പാദിപ്പിക്കപ്പെടുന്നു എന്നും പഠനം വ്യക്തമാക്കുന്നുണ്ട്.

ശാരീരിക വ്യായാമംയാത്രകൾ എന്നാൽ നടത്തം, മലകയറ്റം, നീന്തൽ തുടങ്ങി നിരവധിയായ ശാരീരിക പ്രവർത്തനങ്ങളുടെ സമാഹാരമാണ്. സ്ഥിരമായി ഒരിടത്തിരുന്ന് ജോലി ചെയ്യുന്നവർക്ക് യാത്രകൾ നല്ലൊരു വ്യായാമമാണ് നൽകുന്നത്. ഇത് രക്തയോട്ടം വർദ്ധിപ്പിക്കുകയും Metabolism വേഗത്തിലാക്കുകയും ചെയ്യുന്നു. അസ്ഥികളുടെയും പേശികളുടെയും ആരോഗ്യം മെച്ചപ്പെടാൻ ഇത് സഹായിക്കുകയും ചെയ്യും.

സാമൂഹിക ഇടപെടലുകൾപുതിയ മനുഷ്യരെ പരിചയപ്പെടുന്നതും വ്യത്യസ്ത സംസ്‌കാരങ്ങൾ അറിയുന്നതും തലച്ചോറിന്റെ പ്രവർത്തനത്തെ ഉത്തേജിപ്പിക്കാൻ സഹായകമാകുന്ന ഒന്നാണ്. ഇത് മാനസികമായ ഉന്മേഷം നൽകുന്നതിനോടോപ്പം അൽഷിമേഴ്‌സ് പോലുള്ള രോഗങ്ങളെ പ്രതിരോധിക്കാനും സഹായിക്കുന്നു.

എന്നാ ഒരു യാത്ര പോകുവല്ലേ? മനസും ശരീരവും ഉന്മേഷം കൈവരിക്കുന്നതിനോടൊപ്പം ചെറുപ്പം നിലനിർത്താനും യാത്ര സഹായിക്കും എന്ന കാര്യത്തിൽ ശാസ്ത്രത്തിന്റെ ഉറപ്പ് കൂടി ലഭിച്ചിരിക്കുകയാണ്. പക്ഷെ ഒരു കാര്യം പ്രത്യേകം ശ്രദ്ധിക്കേണ്ടതായിട്ടുണ്ട്. യാത്രകൾ ഗുണകരമാകണമെങ്കിൽ അത് സന്തോഷകരമായിരിക്കണം. കടുത്ത മാനസിക സമ്മർദ്ദം നൽകുന്നതോ, സുരക്ഷിതമല്ലാത്തതോ ആയ യാത്രകൾ വിപരീത ഫലമാകും നൽകുക. സുരക്ഷിതവും സമാധാനപരവുമായ യാത്രകൾ മാത്രമാണ് ആനന്ദവും ആരോഗ്യവും പ്രദാനം ചെയ്യുക.

Content Highlight: Travel slows aging by reducing stress, improving health, and keeping your body and mind active and young.